गजल

मन नरम भयो भने हुरीले नि डराइदिन्छ ।

कहिलेकाहीँ उसको चुरिफुरीले नि डराइदिन्छ ।।

धेरै टाढा होइन तर पहाड थियो हामीबीच,

जब बढ्न थाल्छ छोटो दुरीले नि डराइदिन्छ ।

विश्वासका बोलीहरु घात बने कयौंचोटि,

कशमका शब्दरुपी छुरीले नि डराइदिन्छ ।

सम्बन्धको धरातल कमजोर बन्छ जब,

किनकिन आफ्नै घरको धुरीले नि डराइदिन्छ ।

मुटु छेड्ने माया "राधा" रहर कि वाद्यता हो ?

नबजाऊ न कृष्ण त्यो बाँसुरीले नि डराइदिन्छ ।।

Dear Future Lady... एउटा छन्द कविता

बिस्तारै म फकाउँला मनमनै हाँस्दै रिसाऊ तिमी ।

चोखो प्रेम छँदैछ भित्र मनमा, घुर्की मिसाऊ तिमी ।।

चर्को बोल कुरै नखोल कहिले भाँडा बजारीकन ।

"कालीको अवतारमा प्रिय रती" प्रेमास्त्रले शोभन ।।

*****

घुम्तीबाट पछाडि हेर्छु जहिल्यै बाटो कमै लाग्दछ ।

त्यैँ यात्रा मझदारबाट अघिको चट्टान झैँ लाग्दछ ।।

मेरो युद्ध अनन्त मैसँग न हो - बन्नू तिमी सारथी ।

भावावेश हुँदैन जीवन सधै निष्कर्ष हुन्छन् कति ।।

*****

मेरा स्नायु भरेर प्रेम रसले रित्याउनू त्रास त्यो ।

भै दृष्टान्त बुझाउनू जगतमा यो प्रेम यैँ भक्ति हो ।।

केही चुल्बुल चाहना हृदयका अव्यक्त राखे पनि ।

क्यै भावार्थ बुझी निदान त्यसको ~ पूरा गरौंला म नि ।।

*****

(शार्दूलवीक्रीडित छन्द क्रमश...)