Sunday, September 1, 2019
Dear Future Lady... एउटा छन्द कविता
![](http://blogger.googleusercontent.com/img/b/R29vZ2xl/AVvXsEjS4B2momHl9MEEMp81YcKDQrD-9PXL1UyAjsHh2daf2vEnhzqGtP9a8xIpOIZHEBWK75Wdk35sFHQAVWWzMreIyHjzApPBjYfEj8vhWL1r5K0ld4bxYVKajfk_87JGtz4/s113/IMG_20200502_180114.jpg)
Tuesday, August 27, 2019
गजल
गजल....
यता सिंहदरबारभन्दा मेरो गाउँ आत्मनिर्भर देखिन्छ ।
उता तिम्रो घरको छतैबाट परजीवी शहर देखिन्छ ।।
क्याफे, पार्लर र बारहरु शहरका चौतारी न हुन्,
हाम्रो गाउँको चौतारीमा पिपल र वर देखिन्छ ।।
गाउँको दृश्यले खुशी दिन्छ या दु:ख म भन्न सक्दिन,
आँसु खस्छ जब टालेको भित्तामाथि पुरानो खर देखिन्छ ।।
बुझाइ आ-आफ्नो, कोही माया भन्छन् कोही बैँशको आबेग,
तिमी के भन्छ्यौ ? फक्रदै गरेको कोपिलामा भ्रमर देखिन्छ ।।
प्यास साइली माइलीका फरियाको पनि उस्तै हो,
शहरमा अर्धनग्न शरीरको प्यासी अधर देखिन्छ ।।
भक्तपुर, २०७६ साउन
![](http://blogger.googleusercontent.com/img/b/R29vZ2xl/AVvXsEjS4B2momHl9MEEMp81YcKDQrD-9PXL1UyAjsHh2daf2vEnhzqGtP9a8xIpOIZHEBWK75Wdk35sFHQAVWWzMreIyHjzApPBjYfEj8vhWL1r5K0ld4bxYVKajfk_87JGtz4/s113/IMG_20200502_180114.jpg)
Sunday, September 23, 2018
प्यारी रिसाएपछि
"प्यारी रिसाएपछि" (छन्द:- शार्दूलवीक्रीडित)
कालो बादल अँठ्ठियो मनभरी आकाश नीलो तर ।
मै आफू पनि बन्न सक्छु कसरी - आफै मभन्दा पर ??
मानौँ ढाक्दछ राहुले गगनमा सौर्न्दर्य छर्ने शशि ।
खै के को तुलना गरोस् र कविले प्यारी रिसाएपछि ।।
घुर्कीयुक्त कटाक्ष हान्छ उनको म्यासेजमा स्माइली ।
धन्यै हो प्रविधी छ मख्ख दुनियाँ संजालसंगै भुली ।।
यो सोझो किन अल्झियो प्रणयमा सोच्दैछु टुप्पी कसी ।
चिन्ता एक उपाय के छ अबको प्यारी रिसाएपछि ।।
को होला घरमा कदापि प्रियसी झर्कन्न भन्नेहरु ?
ज्ञानी छिन् सब बुझ्दछिन् रिस सधै अव्यक्त राख्छिन् बरु ।।
यो नारी अधिकार हो प्रकृतिको चुट्दैन जस्को रसी ।
के के को उपमा दिऊँ म विचरा प्यारी रिसाएपछि ।।
😂😃😂
भक्तपुर, २०७५ आश्विन
![](http://blogger.googleusercontent.com/img/b/R29vZ2xl/AVvXsEjS4B2momHl9MEEMp81YcKDQrD-9PXL1UyAjsHh2daf2vEnhzqGtP9a8xIpOIZHEBWK75Wdk35sFHQAVWWzMreIyHjzApPBjYfEj8vhWL1r5K0ld4bxYVKajfk_87JGtz4/s113/IMG_20200502_180114.jpg)
Monday, August 20, 2018
कविता (प्यारो रारा)
प्यारो रारा (छन्द: शार्दूलवीक्रीडित)
ओडी च्यादर मेघको हिमचुली मुस्काउछन् हर्षले ।
पैलैबाट अनन्त बैँस यसको फेरिन्न खै वर्षले ।।
हेरी सुन्दर छाल स्वच्छ जलको थाक्दैन आँखा कतै ।
टुक्रा हो कि प्रफुल्ल स्वर्गपुरको प्यारो छ रारा सधै ।।
मुर्मा शैल श्वेत टम्म हिउँले मीठो छ हावा अहा ।
डाँफे कालिज कस्तुरी वरिपरी उन्मत्त प्रमत्तका ।।
यो स्वर्गीय छटा अहो घनघटा बिर्सेर बिर्सिन्न है ।
यस्तै राग उनेर बन्छ कविता प्यारो छ रारा सधै ।।
ताल्चा स्वागत गर्छ हर्षित हुँदै सम्झ्यौ मलाई भनी ।
हुर्केकी छ पुछारमा गमगढी प्रफुल्ल जैले पनि ।।
धर्तीकी नव-वेहुली छ रसिली सौन्दर्य फैलाउँदै ।
त्यैं सौर्न्दर्य टिपेर छन्द भरियो प्यारो छ रारा सधै ।।
वाशन्ती मधुमास झैं हरघडी माधूर्यमा लिप्त यो ।
धेरैपल्ट पुगेँ पुगीरहुँ सधै यैं चाह - यैं घिट्किसो ।।
छाप्री मन्दिरले सुसेल्छ मुरली ती छाल नाच्छन् जसै।
त्यो खत्याड बगेछ स्नेह झरना प्यारो छ रारा सधै ।।
रारा ताल, मुगु - २०७४
![](http://blogger.googleusercontent.com/img/b/R29vZ2xl/AVvXsEjS4B2momHl9MEEMp81YcKDQrD-9PXL1UyAjsHh2daf2vEnhzqGtP9a8xIpOIZHEBWK75Wdk35sFHQAVWWzMreIyHjzApPBjYfEj8vhWL1r5K0ld4bxYVKajfk_87JGtz4/s113/IMG_20200502_180114.jpg)
Sunday, March 11, 2018
कविता
"आएर मागौँ कि म"
तिम्रा पाउजु झन्किए हृदयको झङ्कार मेरै लिई ।
तिम्रा गाजलु नेत्रबाट सपना देखेँ स्वयं बिर्सिई ।।
यो मेरो मन दौडियो वरिपरी छायाँ म रातोदिन ।
दोबाटो अब ढुक्नु छैन घरमा आएर मागौँ कि म ।।
तिम्रा हात समाउदै अघि बढूँ गन्तव्य यौटै गरी ।
थुम्का लेक सँगै चढेर कहिले मैदान बेशी झरी ।।
त्यैं काली तटमा रमेर गहिरो माया दिऊँ झाँगिन ।
दोबाटो अब ढुक्नु छैन घरमा आएर मागौँ कि म ।।
छन्द :- "शार्दूलवीक्रीडित"
क्रमश...
![](http://blogger.googleusercontent.com/img/b/R29vZ2xl/AVvXsEjS4B2momHl9MEEMp81YcKDQrD-9PXL1UyAjsHh2daf2vEnhzqGtP9a8xIpOIZHEBWK75Wdk35sFHQAVWWzMreIyHjzApPBjYfEj8vhWL1r5K0ld4bxYVKajfk_87JGtz4/s113/IMG_20200502_180114.jpg)